இங்கிலாந்து – நியூசிலாந்து அணிகளுக்கு இடையிலான 2-வது டெஸ்ட் நேற்று எட்ஜ்பாஸ்டனில் தொடங்கியது. டாஸ் வென்ற இங்கிலாந்து பேட்டிங் தேர்வு செய்தது.தொடக்க வீரர்களான ரோரி பேர்ன்ஸ் (81), டாம் சிப்லி (35) ஆகியோர் தாக்குப்பிடித்து விளையாடி முதல் விக்கெட்டுக்கு 72 ரன்கள் சேரத்தனர். அதன்பின் வந்த ஜாக் கிராவ்லி (0), ஜோ ரூட் (4), ஒல்லி போப் (19), ஜேம்ஜ் பிரேசி (0) சொற்ப ரன்களில் ஆட்டமிழந்தனர்.
6-வது வீரராக களம் இறங்கிய டான் லாரன்ஸ் மட்டும் தாக்குப்பிடித்து விளையாடினார். அவருக்கு மார்க் வுட் நல்ல ஒத்துழைப்பு வழங்கினார். இதனால் இங்கிலாந்து நேற்றைய முதல்நாள் ஆட்ட முடிவில் 7 விக்கெட் இழப்பிற்கு 258 ரன்கள் எடுத்திருந்தது. லாரன்ஸ் 67 ரன்களுடனும், மார்க் வுட் 16 ரன்களுடனும் களத்தில் இருந்தனர்.இன்று 2-வது நாள் ஆட்டம் தொடங்கியது. லாரன்ஸ், மார்க் வுட் ஓரளவிற்கு தாக்குப்பிடித்து விளையாடினர். மார்க் வுட் 41 ரன்கள் எடுத்த நிலையில் ஆட்டமிழந்தார். அடுத்து வந்த ஸ்டூவர்ட் பிராட் (0), ஜேம்ஸ் ஆண்டர்சன் (4) டிரென்ட் போல்ட் பந்தில் ஆட்டமிழக்க, இங்கிலாந்து அணி 303 ரன்னில் ஆல்-அவுட் ஆனது. டான் லாரன்ஸ் 81 ரன்கள் எடுத்து ஆட்டமிழக்காமல் இருந்தார்.
நியூசிலாந்து அணி சார்பில் டிரென்ட் போல்ட் 4 விக்கெட்டும், மேட் ஹென்ரி 3 விக்கெட்டும் வீழ்த்தினர்.பின்னர் நியூசிலாந்து முதல் இன்னிங்சை தொடங்கியது. டாம் லாதம் 6 ரன் எடுத்த நிலையில் ஆட்டமிழந்தார். நியூசிலாந்துது ஒரு விக்கெட் இழப்பிற்கு 29 ரன்கள் எடுத்து விளையாடி வருகிறது.
