இங்கிலாந்தில் உள்ள லிவர்பூல் நகரில் பெண்கள் ஆஸ்பத்திரி அருகே நேற்று வாடகை கார் ஒன்று வந்து நின்றது. அதில் டிரைவரும், ஒரு பயணியும் இருந்தனர்.கார் நின்ற அடுத்த விநாடி அதில் இருந்து குண்டு வெடித்தது. இதில் கார் சிதறியது. காரில் இருந்த பயணி அந்த இடத்திலேயே உயிரிழந்தார். கார் டிரைவர் பலத்த காயத்துடன் உயிருக்கு போராடிக்கொண்டு இருந்தார். அவரை ஆஸ்பத்திரியில் சேர்த்தனர். அவர் மோசமான நிலையில் இருந்து தப்பித்துவிட்டதாக டாக்டர்கள் கூறினார்கள்.
இந்த குண்டுவெடிப்பு நிகழ்ந்ததும் அந்த பகுதியில் கடும் பீதி ஏற்பட்டது. மக்கள் அலறியடித்து ஓடினர். பெண்கள் ஆஸ்பத்திரி உடனடியாக மூடப்பட்டது. போலீசாரும், தீயணைப்பு படையினரும் விரைந்து சென்றனர்.காரில் எரிந்த தீ அணைக்கப்பட்டது. அதன் பிறகு போலீசார் விசாரணை மேற்கொண்டனர். அப்போது இது பயங்கரவாத தாக்குதல் என தெரிய வந்தது. பல்வேறு இடங்களில் இருந்த கண்காணிப்பு கேமராக்களை ஆய்வு செய்த போது காரில் மர்ம நபர்கள் குண்டுவைத்தது தெரிய வந்தது.அவர்கள் யார் என்பதையும் அடையாளம் கண்டனர். இதையடுத்து ஆஸ்பத்திரியில் இருந்து 1 கி.மீட்டர் தூரம் உள்ள இடத்தில் ஒரு வீட்டில் அந்த நபர்கள் பதுங்கி இருப்பது தெரிய வந்தது. போலீசார் அவர்களை சுற்றி வளைத்தனர்.3 பேர் கைது செய்யப்பட்டார்கள். அவர்களில் ஒருவருக்கு 29 வயது, மற்றவர்களுக்கு 26 மற்றும் 21 வயது ஆகும். அவர்கள் பெயர் விவரம் என்ன? போன்ற தகவல்கள் எவற்றையும் போலீசார் வெளியிடவில்லை.கார் குண்டு தாக்குதலில் இறந்தவர் பற்றிய விவரம் இன்னும் தெரியவில்லை. பயங்கரவாத தாக்குதல் என்பதால் இங்கிலாந்து முழுவதும் உஷார்படுத்தப்பட்டுள்ளது.
